من مواطن مصري الى النظام المصري

 

• مخنوق يابلد
  منك..... وليكي .....وعليكي
  منك لانك 
  خلتيني ابكي بدل الدموع دم
  ابكي ومحروق على شبابك
  ابكي وحزين من حكامك
  مش بتسيبيني افرح ليه
  ابكي على دم على القضبان
  ابكي على اشلاء تحت المباني المنهاره
  ابكي على شبابك العزل
  بيتجلدوا ويتسجنوا ويتسحلوا
  مستحملانا ازاي
  مستحمله طمع الي طامع فيكي
  ومش باكي عليكي
  مستحملانا ليه ......مستغربانا ليه
  مش انتي الي اويانا
   وجارحانا وحرمانا
  مش انتي الي علمتينا
   اننا نطمع
  مش انتي الي خليتي
   حراميكي هو الي يحميكي
  ولما قلنا لا
   وطلبنا ثلاث طلبات
  طلبنا العيش ناكله ولو حاف
  وطلبنا حريه من العبوديه والذل والاذلال
  وطلبنا عدل وعداله اجتماعيه
  طلبتنا ياترى صعبه
  لما طلبنا
  اتحرقنا وواتقتل فيكي اجمل واشجع شبابك
  كنت فاكر يا بلد ان حالك حينصلح
  كنت فاكر ان الضمير موجود
  والامل موجود
  لكن لقيت الطمع بيسود
  والفساد موجود
  والدمار بيعود
  والفقر لسه في البيوت موجود
  تفتكر امتى يا نظام حتلبي طلبتنا
  تفتكر ممكن اشوف في يوم مصر
  اجمل بلاد الدنيا
  لو شايفها يا نظام وانا مش شايفها
  طمني
  متسكتش وتسيبنا
  علشان انا صبري
  وصبر مصر خلاص نفد
  
  مواطن مصري